ነሐሴ 10/2015 የግርማ የሺጥላ ተከታይ የነበረ ስብስብ የፋኖ ህዝባዊ ሃይል ነኝ በሚል ወጣቶችን እያታለለ ነው

ነሐሴ 10/2015

በሰሜን ሸዋ ዞን መንዝ ጌራ ወረዳ መሀልሜዳ ከተማ አስተዳደር የሟሹ የግርማ የሺጥላ ተከታይ የነበረ ስብስብ የፋኖ ህዝባዊ ሃይል ነኝ በሚል አጀንዳ ወጣቶችን እያታለለ ነው ሲሉ የኢትዮ 360 ምንጮች ገለጹ።

ይሄንን ስብስብ እየመራ ያለው ደግሞ አበባው ቤልጂግ የተባለ የግርማ የሺጥላ የአክስት ልጅ ነው ሲሉም ያጋልጣሉ።

` ይሄው ግለሰብ ዛሬ የፋኖ መሪ በመምሰል ወጣቶችን በመመልመል ትጥቅ ከመሐልሜዳ ከተማ አስተዳደር ሚንሻ ጽህፈት ቤት ከተቀበለ በኋላ ለፋኖነት የገቡ ልጆችን በፋኖ ስም የብልፅግና ታጣቂና ጠባቂ እያደረጋቸው ነው ብለዋል ምንጮቹ።

አበባው ቤልጅግ የተባለ ይሄው ግለሰብ የቫት ተመዝጋቢ የጅምላ አከፋፋይ ነጋዴም ሲሆን ቀደም ሲል እራሱን የፋኖ መሪ በማድረግና ሌላ አጅንዳ በመያዝ ፋኖ እንዳይደራጅ ሴራ ሲሰራና ሲያደናቅፍ መቆየቱንም ሳይናገሩ አላለፉም።

ለዚህም ውለታው በአገዛዙ በኩል የገንዘብ መዝረፊያ መንገድ ተመቻችቶለታል ብለዋል ምንጮቹ።

ትክክለኛው የፋኖ ህዝባዊ ሃይል ወደበርሃ ወርዶ እራሱን እያደራጀ በነበረበት ወቅት ይሄ ግለሰብ ግን ፋኖዎችን በትኖ የስራ አጥ ወጣቶችን ስራ በመንጠቅ በወረዳው አስተዳዳሪ በሀይሌ የሺጥላ የእዝ ደብዳቤ ትዕዛዝ የማዕድን ሽያጭ ዘረፋ ላይ ተሰማርቶ ቆይቷል።

እናም ይላሉ አበባው ቤልጅግ የተባለው ሰው በጥቅም እራሱን አሳውሮ የአገዛዙን ተልእኮ እየፈፀመ ስለሆነ ህዝባዊ ሀይሉ ባለው አደረጃጀት የፋኖ መሪ በመቀየር አደረጃጀቱን ከሰርጎገብ መከላከል የገባዋል ሲሉም ጥቆማቸውን አስቀምጠዋል።

ይህ በእንዲህ እንዳለ ደግሞ የደብረ ብርሃን ከንቲባ ከሰው በላው ስብስብ ጋር በመሆን በከተማዋ ያሉ ባለሃብቶችንና ወጣቶችን በማሳፈን ላይ ነው ሲሉ የኢትዮ 360 ምንጮች ተናግረዋል።