(ኢትዮ 360-ግንቦት 3/2015) በሰሜኑ ጦርነት ወደ አካባቢው ተልከው የነበሩ የመከላከያ አባላት ወደቤተሰባቸው አልተመለሱም።

በሰሜኑ ጦርነት ወደ አካባቢው ተልከው የነበሩ የመከላከያ አባላት ቤተሰቦች እስካሁን ልጆቻቸው ያሉበት ሁኔታ መወቅ እንዳልቻሉ ለኢትዮ 360 ገለጹ።

በተደጋጋሚ ስለልጆቻቸው እንዲነግሯቸው የሚመለከታቸውን አካላት ለማነጋገር ቢሞክሩም ሰሚ ማግኘት እንዳልቻሉ ለኢትዮ 360 በላኩት መረጃ ላይ አስፍረዋል።

የአንዳንዶቹ ልጆቻቸው በጦርነቱ ወቅት መማረካቸውን ቢሰሙም እስካሁን ግን ልጆቻቸውን ለማስመለስ የሞከረ አካል እንደሌለም ይናገራሉ።

ሌሎቹ ወላጆች ደግሞ እስካሁን የልጆቻቸው ደብዛ እንደጠፋ መሆኑን በመረጃቸው ላይ አመልክተዋል።

ቤተሰቦቻቸው እንደሚሉት በጦርነቱ ወቅት ከፍተኛ ቁጥር ያለው የመከላከያ ሃይል መማረኩን እንዲሁም መገደሉን ሰምተዋል።

ነገር ግን ከሁለት አመት በላይ ልጆቻቸው ስላሉበት ሁኔታ የሚነግራቸው አካል ማግኘት እንዳልቻሉ አስታውቀዋል።

ልጆቻቸው በጦርነቱ ወቅት ተሰውተውም ከሆነ እንደወጉ የልጆቻቸውን መርዶ መስማት እንዳይችሉ መደረጋቸውን ነው የሚያነሱት።

በተለይ ደግሞ በምርኮኛ ስም እስካሁን እየተሰቃዩ ያሉ ልጆቻቸውን ተስማማን ያሉት አካላት ሊለቁላቸው እንደሚገባም ነው በመረጃቸው ላይ ጥሪያቸውን ያቀረቡት።

ከ1 ነጥብ 2 ሚሊየን በላይ ንጹሃን ዜጎች ባለቁበት በሰሜኑ ጦርነት ከፍተኛ ቁጥር ያለው የመከላከያ ሃይልም መገደሉንና ለከፋ የአካል ጉዳት መዳረጉን ከዛም አልፎ በሺዎች የሚቆጠሩት ደግሞ በምርኮኛ ስም ታግተው እንደሚገኙም በተደጋጋሚ ሲገለጽ መቆየቱንም ለኢትዮ 360 በላኩት መረጃ ላይ አስፍረዋል።