ኢትዮ 360-ግንቦት 8/2015) በአዲስ አበባ ከተማ በጉልት የችርቻሮ ንግድ የተሰማሩ ነዋሪዎች የንግድ ቦታ እየፈረሰ ነው።

በአዲስ አበባ ከተማ በጉልት የችርቻሮ ንግድ የተሰማሩ ነዋሪዎች የንግድ ቦታ ያለምንም ማስጠንቀቂያ ሲፈርስ መዋሉን የኢትዮ 360 ምንጮች ገለጹ።

በተለይ በቦሌ ክፍለ ከተማ የሚገኘውና ለረጅም አመታት እነዚህን ነጋዴዎች ይዞ የቆየው የየረር ጉሊት የንግድ ቦታ ዛሬ ሲፈርስ መዋሉንም ምንጮቹ ያነሳሉ።

ይሄንን አካባቢው የማፍረሱ ትእዛዝ በዋናነት የወረደው ከከተማዋ ከንቲባ ቢሮ ሲሆን ዋና አለማውም በአረንጓዴ ልማት ስም ለባለጊዜ ባለሃብቶች ለማደል ነው ይላሉ።

የነባሯንና የጥንቷን አዲስ አበባ ከለር ለመቀየር እየተሯሯጠ ያለው የኦህዴድ መራሹ ስርአት የንግድ ቦታዎችንና መኖሪያ ቤቶችን በማፍረስ ብቻ ሳይሆን አይን ባወጣ ሌብነት ላይም የተሰማራ ስርአት ነው ሲሉም እየተሰራ ያለውን ወንጀል ይናገራሉ።

በየረር ጉሊት የነበሩ ነጋዴዎች በአካባቢው የቆዩበት ዘመን ምናልባትም ወደ ሶስት አስርት አመታት የሚጠጋ ይሆናል ሲሉ የተፈናቃዮቹን ታሪክ ያነሳሉ።

በጀርመን ድልድይ፣በቡራዩ፣በፒያሳና በሌሎች አካባቢዎች የደሃውን የንግድ ቦታ ሲያፈርስ የቆየው አካል ዛሬ ደግሞ በቀጥታ ያለምንም ማስጠንቀቂያ ነባሩን የየረር ጉሊትን ወደ ፍርስራሽነት መቀየሩን ገልጸዋል።

ንብረቱን እንኳን እንዲያወጣ ጊዜ ያልተሰጠው ነጋዴ አይኑ እያየ ምርቶቹ ከመደብሩ ጋር እንዲፈርሱበት ሆነዋል ይላሉ።

እንደምንም ብለው ንብረታቸውን ያዳኑ ነጋዴዎች ደግሞ ከወረደባቸው ድንገተኛ ዱብ እዳ ጋር ተያይዞ ንብረታቸውን ይዘው ወዴት እንኳን እንደሚሄዱ ግራ ገብቷቸዋል ሲሉ በአካባቢው የነበሩት የኢትዮ 360 ምንጮች ገልጸዋል።-ምናልባትም የዚህ የሌባ ስብስብ የሆነው ቡድን ሰለባ ሊሆኑ ይችላሉ ሲሉም ስጋታቸውን ያስቀምጣሉ።

በየካ፣በሱሉልታና በተለያዩ አካባቢዎች በተለይ የአማራ ተወላጆችን ቤት እያፈረሰ ያለው የኦህዴድ መራሹ ስርአት ባሰማራው ወንጀለኛ ቡድን አማካኝነት የነዋሪውን ንብረት በመስረቅ ተግባር ላይ ተሰማርቷል ብለዋል።

ከዛም አልፎ ቤቱ ፈርሶበት ንብረቱን ለመጫን የሞከረው ነዋሪ ለአፍራሹ ሃይል አስር ሺ ብር አልከፈልክም በሚል ንብረቱ እየተዘረፈበት መሆኑን ኢትዮ 360 በተደጋጋሚ መረጃውን ማውጣቱ ይታወሳል።