ግንቦት 10/2015 በአዲስ አበባ የሚታፈኑ ልጆቻቸውን ቤተሰቦቻቸው ማግኘት አልቻሉም።

በአዲስ አበባ ከተለያዩ አካባቢዎች የሚታፈኑ የአማራና የደቡብ ብሔር ተወላጆች ከተያዙ በኋላ ሊያገኟቸው አለመቻላቸውን ቤተሰቦቻቸው ገለጹ።

አፈናውን የሚያካሂዱት ሰዎች ወዴት እንደሚወስዷቸው ቢጠይቁ እንኳን ምላሽ ለመስጠት ፍቃደኛ አይደሉም ይላሉ።

ከዛም አልፎ እንደ ኤርሚያስ መኩሪያ አይነቶቹን ለበጎ ተግባር ሲንቀሳቀሱ በገዛ መኪናቸው የታፈኑትን ጨምሮ በሺዎች የሚቆጠሩ የአማራና የደቡብ ተወላጆች በዚሁ አፋኝ ቡድን መታገታቸውን ኢትዮ 360 በተደጋጋሚ ምዘገቡ ይታወሳል።

በሸገር ትራንስፖርት ቃሊቲ ዲፖ ቢሮ በእቃ ግዢ ሙያ የተሰማራው እንዳልካቸው እሸቱም የዚህ ቡድን ሰለባ ከሆነ 11 ቀን አልፎታል ብለዋል ባለቤቱ።

በወቅቱ የሚወሰድበትን ቦታ ቢጠይቁም ምላሽ ሲያጡ በሁሉም አቅጣጫ ለማግኘት ሙከራ ማድረጋቸውን ነው የሚያነሱት።

እንዳልካቸው እሸቱ ከታሰረ በኋላ እዚህ ይሆናል ብለው ከመጠራጠር ያለፈ ምንም ፍንጭ ሊያገኙ አለመቻላቸውንም ይናገራሉ።

በየትኛውም ፖለቲካ ውስጥ ምንም አይነት ተሳትፎ የለውም የሚሉት ባለቤቱ ቤቱን እንኳን ሲፈትሹ ያገኙት አንዳችም ነገር የለም ሲሉ በሐዘኔታ ይናገራሉ።

በወቅቱ ከታፈነ በኋላ ስልኩ ላይ ደጋግመው በመደወል ለማግኘት ቢሞክሩም ስልኩ እስከተዘጋበት ጊዜ ድረስ ምላሽ የሚሰጣቸው አካል አለማግኘታቸውም ይናገራሉ።

በጭለማ የታፈነውን እንዳልካቸው እሸቱ የት እንደወሰዱት ማግኘት ያልቻሉት ቤተሰቦቹ አሁንም አፍኖ የወሰደው አካል ያለበትን ቦታ እንዲነግራቸው በመልፋት ላይ መሆናቸውንም ነው ለኢትዮ 360 የገለጹት።