በሆሮጉድሩ ወለጋ በጃርዴጋና አካባቢው ለስራ ከሄዱ የመከላከያ አባላት መካከል የአማራ ተወላጅ የሆኑ የሰራዊቱ አባላት ተለይተው መታፋናቸውን የኢትዮ 360 ምንጮች አስታወቁ።
በቁጥር ምን ያህል እንደሆነ ማወቅ አልተቻለም የሚሉት ምንጮቹ ነገር ግን ወደ አካባቢው እንዲገባ ተደርጎ የነበረው ሃይል ቁጥሩ ከፍተኛ ከመሆኑ ጋር ተያይዞ የታፋኞቹም ብዛት ከፍተኛ ሊሆን ይችላል ሲሉም ግምታቸውን አስቀምጠዋል።
ከዚሁ ሃይል ጋር አብረው የነበሩና የትግል ጓደኞቻቸው ላይ ጥቆማ በመስጠት አፈናው እንዲካሄድ ያደረጉት የኦህዴዱ የመከላከያ አባላት ደግሞ ከነትጥቃቸው ወደ ኦነጉ ቡድን መግባታቸውን ሳይጠቁሙ አላለፉም።
በዚሁ ገዳይ ቡድን የታፈኑትና ወዳልታወቀ ስፍራ የተወሰዱት የአማራ ተወላጅ የሆኑት የሰራዊቱ አባላት እስካሁን በህይወት ስለመኖራቸው የታወቀ ነገር የለም ሲሉ ምንጮቹ ተናግረዋል።
ይህ በእንዲህ እንዳለ በዚሁ ዞን አሙሩ ወረዳና አካባቢው በየቀኑ በአማራ ተወላጆች ላይ የሚካሄደው አፈና ተጠናክሮ መቀጠሉን የኢትዮ 360 ምንጮች ገልጸዋል።
ሰሞኑን ብቻ ከየአካባቢው የሚታፈኑ የአማራ ተወላጆች ቁጥር ከፍተኛ ከመሆኑ ጋር ተያይዞ ምን ያህል ለሚለው ምላሽ ማግኘት አልተቻለም ብለዋል።
ከዛም አልፎ የአማራ ተወላጆቹ ከታፈኑ በኋላ የሚወሰዱበት ቦታ አለመታወቁ ደግሞ ነገሩን አሳሳቢ አደርጎታል ብለዋል።
በአካባቢው በየጊዜው ንጹሃን የአማራ ተወላጆች ላይ የዘር ማጥፋት ዘመቻ የሚፈጽመውና ቤተመንግስቱን ከተቆጣጠረው አካል መመሪያ የሚሰጠው ይሄው ገዳይ ቡድን በአዲስ መልኩ በአካባቢው አፈናና ዝርፊያ መጀመሩን ይናገራሉ።
መሬትም ሆነ መኖሪያ አልባ የተደረገው የአማራ ህዝብ ደግሞ የሚዘረፈው አይደለም የሚላስ የሚቀመስ ካጣ አመታት አስቆጥሯል ሲሉ ምንጮቹ ሁኔታውን ገልጸዋል።